कंदील हा अगदी आजपर्यंत वापरला जाणारा दिवा आहे. कंदिलाच्या डिझाईनमध्ये पुष्कळ विविधता आढळते. काचाही वेगवेगळ्या प्रकारच्या असतात. सामान्यपणे कंदिलात रॉकेल इंधन म्हणून वापरले जाते. कंदील पकडण्यासाठी सोयीस्कर असे हँडल असते. कंदील हा एक बहुगुणी, बहुउपयोगी दिवा आहे. तो हातात घेऊन फिरता येते. कंदील प्रवासाला नेता येतो, टेबलावर किंवा जमिनीवर ठेवता येतो, त्याचप्रमाणे भिंतीवर एखादया खुंटीला टांगता येतो. वादळवाऱ्यातही तो विझत नाही म्हणून ग्रामीण भागातील शेतकऱ्यांचा तो महत्वाचा साथीदार आहे. ज्या भागात वीजपुरवठा वरचेवर खंडित होतो अशा वस्त्या-वाड्यांवर कंदील आजही अत्यंत उपयुक्त ठरतो.